مقبوضہ بیت المقدس میں اسرائیلی پولیس نے پیر کی رات پانچ شہریوں کو حراست میں لے لیا۔ ان افراد کو مقبوضہ بیت المقدس کی الطور کالونی میں شروع ہونے والی پر تشدد جھڑپوں کے بعد حراست میں لیا گیا۔
مقامی ذرائع کا کہنا ہے کہ یہ جھڑپیں المقاصد ہسپتال اور الطور کلب کے قریب شروع ہوئیں جس کے بعد ان کا سلسلہ الصوانہ کالونی تک پھیل گیا۔ آتشیں اسلحے سے لیس اسرائیلی بارڈر سیکیورٹی فورس اور قابض پولیس کے اہلکاروں نے مظاہرہ کرنے والےنوجوانوں پر اشک آور گیس کے گولے، صوتی بم اور ربڑ کی گولیاں بڑی تعداد میں استعمال کیں۔ احتجاجی مظاہرین نے جواباً پتھر اور لوہے کے راڈ پولیس پر پھینکے۔ ان جھڑپوں میں پانچ افراد کو حراست میں لے لیا گیا۔
ذرائع کا کہنا ہے کہ شورش زدہ بلدیہ میں یہ جھڑپیں مسلسل چار روز سے جاری ہیں۔ مظاہرین گزشتہ جمعہ کو اسرائیلی فوج کے مسجد اقصی پر حملے کی ناپاک جسارت پر سراپا احتجاج ہیں۔
بشکریہ: مرکز اطلاعات فلسطین