اسرائیلی فوج کے ایک بڑے دستے نے الخلیل کے جنوب میں دورا قصبے پر دھاوا بول دیا جہاں انہوں نے متعدد گھروں پر چھاپے مارے اور تلاشی لی۔
اسرائیلی فوج نے دورا اور اسکے مضافاتی دیہات میں فوجی پابندیاں سخت کردیں جس کے نتیجے میں شہری فجر کی نماز ادا کرنے مساجد میں نہ جاسکے۔
خرسہ جنکشن کے نزدیک چھ دن قبل اسرائیلی فوجی گاڑی پر فائرنگ کرنے والے نامعلوم افراد کی تلاش میں جاری آپریشن کے دوران دو کم سن بچوں سمیت 3 فلسطینیوں کو گرفتار کرکے نامعلوم مقام پر منتقل کردیا۔
اسی دوران اسرائیلی فوجیوں نے الخلیل کے شمال میں حلحول کے علاقے دروا پر دھاوا بول دیا جہاں انہوں نے فوجی ناکے قائم کردیئے۔ اس کے نتیجے میں فلسطینی نوجوانوں نے فوجیوں پر پتھرائو کیا جس کے جواب میں فوجیوں نے نوجوانوں پر آنسو گیس کی شیلنگ کی۔ شیلنگ کے نتیجے میں ایک شہری زخمی ہو گیا۔ اس واقعہ میں کسی حراست کی رپورٹ درج نہیں ہوئی۔