مغربی کنارے میں اسرائیلی فوج کی جانب سے فلسطینیوں کی گرفتاریوں کا سلسلہ جاری ہے۔ اتوار کے روز بیت لحم اور الخلیل کے شہروں سے چھ فلسطینیوں کو حراست میں لیا گیا جن میں پچاس سال سے زائد عمر کی ایک خاتون بھی شامل ہیں۔
فلسطینی سکیورٹی ذرائع نے خبر رساں ایجنسی ”قدس پریس” کو بتایا کہ تاریخی شہر الخلیل میں اسرائیلی فوج نے دو نوجوانوں کو گرفتار کیا۔ ایمن علی موسی ابو عرقوب کا تعلق السموع ٹاؤن سے ہے جبکہ ھانی خضر الجیاوی کا تعلق اذنا ٹاؤن سے۔
ادھر الخلیل کی اولڈ میونسپلٹی کے علاقے سے ایک باون سال کی خاتون زلیخا قاسم المحتسب کو حراست میں لے لیا گیا، اسرائیلی اہلکاروں نے اس ادھیڑ عمر خاتون کو کئی گھنٹے حراست میں رکھ کر رہا کردیا۔ ترقومیا ٹاؤن میں صہیونی درندوں نے ایک نوجوان محمد عبد اللطیف کو زبردست تشدد کا نشانہ بنایا جس سے وہ بری طرح زخمی ہوگیا۔
بیت لحم میں بھی اسرائیلی فورسز نے جارحیت جاری رکھتے ہوئے الخضر ٹاؤن سے تین نوجوانوں کو گرفتار کیا، اسی شہر سے ایک اور نوجوان کو بھی گرفتار کرکے تفتیشی مرکز ”عتصیون” منتقل کرنے کی اطلاعات موصول ہوئی ہیں۔
یہودی آباد کاری کے خلاف سرگرم فلسطینی انجمن ”قومی کمیٹی” کے ڈائریکٹر احمد صلاح نے بتایا کہ اسرائیل فوج نے احمد عبد السلام، علی محمود رشید اور شادی علی صلاح کو گرفتار کر لیا ہے ان تینوں کی عمریں بالترتیب 21، 23 اور 33 سال ہیں۔
بشکریہ:مرکز اطلاعات فلسطین