اسرائیلی سکیورٹی فورسز نے مغربی کنارے کے تاریخی شہر الخلیل میں ایک مسجد پر اشک آور گیس کے شیلوں، دھواں چھوڑنے والے شیلوں اور ساؤنڈ بموں کی بوچھاڑ کر دی جس کے باعث مسجد کے اندرونے احاطے میں آگ بھڑک اٹھی۔
الخلیل کے جنوبی الفوار کیمپ کے شمالی علاقے ’’الھجری‘‘ میں مسجد علی بن ابی طالب میں لگنے والی آگ کی اطلاع کے بعد فائر بریگیڈ کے عملے نے فوری طور پر موقع پر پہنچ کر آگ بجھانے کی کارروائی شروع کردی۔
سول ڈیفنس کے میڈیا اور تعلقات عامہ کے یونٹ کے مطابق فائر بریگیڈ کے عملے کے بروقت پہنچ کر امدادی کارروائی کی بدولت مسجد کے اندرونی ہال کے قالین اور دیگر اشیاء کو لگنے والی آگ پر قابو پا لیا گیا اور مسجد کسی بڑے نقصان سے محفوظ رہی۔
واقعے کے بعد اہل علاقہ میں غم و غصے کی شدید لہر دوڑ گئی ہے۔
بشکریہ:مرکز اطلاعات فلسطین