مغربی کنارے کے جنوبی شہر الخلیل میں اسرائیلی فوج نے بدھ کو علی الصباح ایک فلسطینی شہری کے گھر پر قبضہ کر لیا۔ اسرائیلی فوج نے شہر کی نگرانی کے لئے متعدد واچ ٹاور نصب کر دیئے۔
فلسطینی سیکیورٹی ذرائع نے خبر رساں ادارے ‘قدس پریس’ کو بتایا کہ صہیونی فوجیوں نے الخلیل شہر کے وسط میں الشلالة روڈ پر واقع ایک فلسطینی کے گھر دھاوا بول دیا۔ فوجیوں نے گھر کی چھت کا کنٹرول حاصل کر کے اسے فوجی بیرک میں تبدیل کر دیا۔
اس کے بعد اہالیاں علاقہ اور صہیونی فوجیوں کے درمیان جھڑپوں کا سلسلہ شروع ہو گیا۔ جھڑپوں کے دوران فلسطینی شہریوں نے اسرائیلی فوج پر پتھراٶ کیا اور ان پر شیشے کی خالی بوتلیں پھینکیں۔
ایک اور پیش رفت میں اسرائیلی فوج نے الرمیدہ پہاڑی اور جبل الرحمہ کے علاقے میں متعدد واچ ٹاورز نصب کر دیئے تاکہ الخلیل شہر کی نگرانی کی جا سکے۔
درایں اثناء اسرائیلی فوج نے الخلیل کی نواحی میونسپلٹی الظاہریہ سے چوبیس سالہ نوجوان حماد فیصل الھوارین کے گھر پر چھاپے اور تلاشی کے بعد حراست میں لے لیا۔
بشکریہ:مرکز اطلاعات فلسطین