اسکردو، یوم القدس کی تصویری جھلکیاں

عالمی یوم القدس کے موقع پر بلتستان کی مرکزی القدس ریلی اسکردو میں انجمن امامیہ بلتستان کے زیراہتمام نکالی گئی جس میں امامیہ اسٹوڈنٹس آرگنائزیشن پاکستان بلتستان ڈویژن، مجلس وحدت مسلمین پاکستان بلتستان ڈویژن، جعفریہ اسٹوڈنٹس آرگنائزیشن بلتستان ڈویژن، شیعہ علماء کونسل اور تحریک بیداری امت مصطفی ؐ نے شرکت کی۔ القدس ریلی بعد از نماز جمعہ مرکزی امامیہ جامع مسجد اسکردو سے برآمد ہوئی۔ ریلی میں تمام مذہبی تنظیموں اور شخصیات کے علاوہ عوام کی بڑی تعداد نے شرکت تھی۔ ریلی کے شرکاء نے ہاتھوں میں پلے کارڈز اٹھا رکھے تھے جس پر امریکہ و اسرائیل کے خلاف نعرے درج تھے۔ شرکائے ریلی نے مسلمانان فلسطین کے حق میں اور امریکہ و اسرائیل کے خلاف شدید نعرہ بازی کی۔ اسکردو کی فضا ہزاروں القدس ریلی کے شرکاء کے "القدس لنا” کے فلک شگاف نعروں سے گونج رہی تھی۔ اس موقع پر مظاہرین نے اپنے ہاتھوں میں امام خمینی رہ، رہبر معظم اور بیت المقدس کی تصویریں بھی اٹھا رکھی تھیں جبکہ بہت سوں کے ہاتھ میں فلسطین اور پاکستان کے علاوہ آئی ایس او کے پرچم موجود تھے۔ القدس ریلی جب یاد گار شہدا اسکردو پرپہنچی تو ایک عظیم الشان جلسے کی صورت اختیار کر گئی جس سے آئی ایس او کے صدر شفقت غازی، ایم ڈبلیو ایم کے سربراہ آغا علی رضوی، جے ایس او کے سربراہ یاسین عابدی کے علاوہ علامہ مرزا یوسف حسین نے خطاب کیا۔