اسلامی یونیورسٹی میں اسرائیل کا ثقافتی اسٹال

پاکستان کے دارالحکومت اسلام آباد میں اسرائیلی ثقافت اور تل ابیب کو امن کا علمبردار ظاہر کرنے کے لیے بعض عناصر متحرک ہو گئے ہیں۔ بین الاقوامی  اسلامی یونیورسٹی میں اسرائیلی ثقافت اور مصنوعات کی تشہیر کے لیے اسٹال لگا دیا گیا۔ اسرائیلی جھنڈوں کو نمایاں کر کے مظلوم فسلطینوں کے زخموں پر نمک پاشی کی گئی۔
 
خبر رساں ادارے "ثنا نیوز” کے مطابق یونیورسٹی انتظامیہ کی جانب سے اسٹال لگنے کی تصدیق کی گئی ہے جبکہ دوسری جانب اس غیر معمولی واقعے سے متعلق تحقیقات کے لیے یونیورسٹی نے تین رکنی ٹیم قائم کر دی ہے۔ تقریب کی تصاویر سامنے آنے پر سیاسی ودینی حلقوں میں غم وغصے کی شدید لہر دوڑ گئی۔
 
تفصیلات کے مطابق اسلامی جمہوریہ پاکستان میں مسلمانوں کے جذبات کو مجروح کرنے سے متعلق یہ اسرائیلی ثقافتی سٹال فیصل مسجد کے عین نیچے ہال میں لگایا گیا۔ خبر رساں ادارے کے مطابق ”یو این تقریری مقابلے” کے عنوان سے تقریب بین الاقوامی اسلامی یونیورسٹی کی فکلیٹی آف مینجمنٹ سائسنسز [خواتین ونگ] کے تحت برپا کی گئی تھی۔ تقریب کے موقع پر بعض طالبات بشمول مختلف ممالک کی طالبات نے اسرائیلی ثقافت کا اسٹال لگایا جہاں اسرائیل کی مختلف مصنوعات کی نمائش کے لئے پیش کی گئی تھیں ان میں اسرائیل کو خصوصی طور پر امن  وخوشحالی کا علمبردار دکھانے کی کوشش کی گئی اور اس حوالے سے بھی مختلف بینرز آویزاں کئے گئے تھے۔
 
اسرائیلی جھنڈے اور صہیونی قائدین کی تصاویر بھی نمایاں تھیں۔ ‘نجمہ داود’ والے اسرائیلی پرچموں میں انتہائی دیدہ زیب ایک سٹال پر سجی مصنوعات کے حوالے سے لگے بینرز پر Form ISRAEL کے الفاظ نمایاں تھے۔ سٹال کے مرکزی بینر پر جس کے پس منظر میں اسرائیلی جھنڈے بھی نمایاں تھے پر لکھا تھا WELCOME TO THE LAND OF PEACE & PROSPERITY۔

”ثناء نیوز” کے رابطہ کرنے  پر بین الاقوامی اسلامی یونیورسٹی کے لیگل ایڈوائزر ڈاکٹر عزیز الرحمان نے بتایا کہ”فکلیٹی آف مینجمنٹ سائسنسز” شعبہ خواتین  کے تحت فیصل مسجد کے عین نیچے واقع ہال میں ماڈل  ‘یو این ڈیبیٹ کانٹسٹ’ کا انعقاد کیا گیا تھا جس میں اقوام متحدہ کے نمائندہ ممالک کے سٹال لگائے گئے تھے۔ طالبات نے بغیر اجازت اسرائیل کا سٹال بھی لگایا اور اس پر اسرائیلی ثقافتی اور مصنوعات کو سجایا گیا تھا۔ جیسے ہی انتظامیہ کو اس کاعلم ہوا  اسے بند کروا دیا گیا۔
 
اسلامی یونیورسٹی انتظامیہ نے یونیورسٹی کے نائب صدر ڈاکٹر طاہر منصوری کی سربراہی میں ایک اعلیٰ سطحی کمیٹی قائم کر دی گئی ہے جو اس معاملے کی تحقیقات کرے گی اور ذمہ داران کے خلاف سخت کاروائی کی جائے گی۔

بشکریہ:مرکزاطلاعات فلسطین