فلسطینی وزارت داخلہ نے غزہ کی پٹی میں اسرائیلی فوج کے فضائی حملوں کی شدید الفاظ میں مذمت کی ہے۔ وزارت داخلہ کی جانب سے جاری ایک بیان میں کہا گیا ہے کہ صہیونی فوج دانستہ طور پر غزہ کی پٹی میں فلاحی اداروں کے مراکز کو نشانہ بنا رہی ہے۔
مرکز اطلاعات فلسطین کے مطابق وزارت داخلہ کے ترجمان زیاد البزم نے میڈیا سے گفتگو کرتے ہوئے کہا کہ اسرائیلی فوج نے تازہ فضائی حملوں میں انفرااسٹرکچر، کارخانوں، ورکشاپوں اور فلاحی اداروں کے مراکز کو نشانہ بنایا ہے۔ایک سوال کے جواب میں فلسطینی عہدیدار نے کہا کہ جمعہ کے روز اسرائیلی فوج کے جنگی طیاروں نے دودھ کی ایک فیکٹری کو میزائل حملوں سے نشانہ بنایا۔ اسرائیلی فوج کے حملے میں فیکٹری تباہ ہو گئی اور کئی افراد زخمی ہوئے ہیں۔ شہری مفادات کو نشانہ بنائے جانے سے بچوں اور عام شہریوں میں سخت خوف پایا جا رہا ہے۔
فلسطینی وزارت داخلہ کے ترجمان نے عالمی برادری کی جانب سے اسرائیلی فوج کے مظالم کا نوٹس نہ لینے پر شدید تنقید کی اور کہا کہ عالمی برادری نے فلسطینیوں کے حوالے سے اپنے حصے کا کام کرنے میں کوتاہی کا مظاہرہ کیا ہے۔