الخلیل (فلسطین نیوز۔مرکز اطلاعات) گذشتہ روز اسرائیلی وزیر برائے مذہبی مور ڈیوڈ اولازے نے صیہونی شرپسند آباد کاروں کے ایک گروپ کے ہمراہ اسرائیلی فوج کی فول پروف سیکیورٹی میں مسجد ابراہیمی پر دھاوا بولا اور مقدس مقام کی بے حرمتی کی۔
فلسطین نیوز کو موصول ہونے والی اطلاعات کے مطابق دوسری جانب فلسطینی وزیر برائے اوقاف و مذہبی امور یوسف ادعیس نے اسرائیلی وزیر کے مسجد ابراہیمی پر دھاوے کو مذہبی اشتعال انگیزی قرار دیا ہے۔ ان کا کہنا ہے کہ اسرائیلی وزیر کا فوج اور پولیس کی فول پروف سیکیورٹی میں مسجد ابراہیم خلیل اللہ میں داخل ہونا اور مذہبی رسومات کی ادائیگی کی آڑ مقدس مقام کی بے حرمتی کرنا مسلمانوں کے جذبات کو مشتعل کرنے کی مذموم کوشش ہے۔الشیخ ادعیس نے کہا کہ مسجد ابراہیمی خالص مسلمانوں کا دینی مرکز اور عبادت گاہ ہے جس پر صیہونیوں سمیت کسی دوسری قوم کا کوئی حق نہیں۔ اسرائیلی وزیر کا مسجد ابراہیمی میں گھس کر مذہبی رسومات کی ادائیگی کی آڑ میں مسلمانوں کے جذبات کو مشتعل کرنا ناقابل قبول ہے۔