بیت لحم – (فلسطین نیوز۔مرکز اطلاعات) صہیونی فوج نے فلسطین کے مقبوضہ علاقوں غرب اردن اور بیت المقدس میں آج منگل کو بھی فلسطینی شہریوں کے خلاف کریک ڈاؤن جاری رکھا ہے۔ اب تک کی اطلاعات کے مطابق قابض فوج نے دھاووں میں کم سے کم سات فلسطینیوں کو حراست میں لینے کے بعد نامعلوم مقام پر منتقل کر دیا ہے۔
فلسطین نیوز کو موصول ہونے والی اطلاعات کے مطابق منگل کو نماز فجر کے وقت اسرائیلی فوج نے غرب اردن اور بیت المقدس میں متعدد مقامات پر گھر گھر تلاشی کا سلسلہ شروع کیا۔قابض فوج نے غرب اردن کے جنوبی شہر بیت لحم میں وادی شاہین سے 22 سالہ سلیم محمد نواورہ اور وادی معالی سے 22 سالہ فادی سمیر غزاوی کو حراست میں لے لیا۔
ادھر قابض فوج نے شہید محمد شحادہ کے گھر پربھی چھاپہ مارا۔ مقامی فلسطینی شہری آیت اللہ کے سیلون پر بھی چھاپہ مار کر توڑپھوڑ کی گئی۔ قابض فوج کا کہنا ہے کہ وادی معالی سے انہیں’کارلو‘ نامی بندوق بھی ملی ہے۔
ادھر القدس سے قابض فوج نے مومن الحشیم، فواد الشاویش، یعقوب الشاویش، محمد مزعرو، شعفاط کیمپ سے کرم صابر سلوم اور سلفیت میں کفرالدیک سے بھی ایک شہری کوحراست میں لیا گیا۔