مرکزاطلاعات فلسطین کے مطابق صہیونی فوج نے غزہ کے مشرقی علاقے الشجاعیہ میں اتوارکو علی الصباح وحشیانہ بمباری کی۔ اسرائیلی فوج کے جنگی جہازوں اور توپخانے سے کی گئی بمباری میں کم سے کم 17 فلسطینی شہید اور درجنوں زخمی ہوگئے ہیں۔
غزہ محکمہ صحت کا کہنا ہے کہ امدادی کارکن بمباری کے باوجود الشجاعیہ میں متاثرین تک پہنچے اور زخمیوں کو اسپتالوں میں لانے کی کوشش کررہے ہیں۔ صہیونی فوج کے وحشیانہ حملوں میں درجنوں افراد زمین بوس ہونے والے مکانوں کے ملبے تلے دبے ہوئے ہیں، جنہیں نکالنے میں امدادی کارکنوں کو شدید دشواریوں کا سامنا کرنا پڑ رہا ہے۔
غزہ وزارت صحت کے ترجمان ڈاکٹر اشرف القدرہ نے میڈیا کو بتایا کہ اتوار کو علی الصباء اسرائیلی فوج کے زمینی اور فضائی حملے میں سیکڑوں افراد کے شہید اور زخمی ہونے کی اطلاعات ہیں۔ الشجاعیہ میں صہیونی بربریت سے زخمی ہونے والے درجنوں افراد کو اسپتالوں میں منتقل کیا گیا ہے۔ شہری دفاع کے رضاکار ملبے سے زخمیوں اورشہداء کی لاشوں کو نکالنے کی کوششیں جاری رکھے ہوئے ہیں۔ الشجاعیہ کے مقام پر صہیونی فوج کا یہ اب تک سب سے تباہ کن حملہ ہے۔ ہفتے اور اتوار کی درمیانی شب بھی دشمن فوج کے جنگی طیارے اور ٹینک الشجاعیہ میں مسلسل بمباری کرتے رہے جس میں 12 فلسطینی شہید ہوگئے تھے۔
خیال رہے کہ آٹھ جولائی سے غزہ کی پٹی پر جاری اسرائیلی فوج کی ریاستی دہشت گردی میں اب تک 350 سے زائد شہری شہید اور 2300 زخمی ہوچکے ہیں۔ شہداء اور زخمیوں کی اکثریت خواتین اور بچوں پرمشتمل ہے، جو فلسطینیوں کی اجتماعی نسل کشی کا منہ بولتا ثبوت ہے۔