اسرائیلی فوج نے مغربی کنارے کے ضلع جنین کے مختلف علاقوں میں کی گئی چھاپہ مار کارروائیوں میں تین فلسطینی شہریوں کو حراست میں لے لیا ہے۔ اسرائیلی فوجی اہلکار دن بھر قباطیہ، زبابدہ، عرابہ اور مرکہ کے علاقوں میں گشت کرتے رہے۔
مقامی ذرائع نے بتایا کہ اسرائیلی فوج کے درجنوں صہیونی اہلکاروں نے قباطیہ میں دھاوا بول کر تین نوجوانوں کو گرفتار کر کے نامعلوم مقام کی جانب منتقل کر دیا ہے۔ اسرائیلی فوج نے تینوں فلسطینیوں کے گھروں میں گھس کر بڑے پیمانے پر توڑ پھوڑ بھی کی۔
گرفتار کیے جانے والوں میں 20 سالہ محمد سعید ابو الرب، 21 سالہ حسام یحی ابو الرب اور 21 سالہ سعید سباعنہ شامل ہیں۔
اسرائیلی فوج نے متعدد فلسطینی گھروں کو منہدم کر دیا، اس دوران کئی شہریوں سے گھنٹوں کی تفتیش کی جاتی رہی۔
عینی شاہدین نے بتایا کہ اسرائیلی فوج کی بڑی تعداد نے الزبابدہ کے علاقے میں بھی علی الصبح فجر کے وقت حملہ کیا اور متعدد گھروں میں گھس کر اہل خانہ کو زد و کوب کیا ہے۔
عرابہ علاقے سے موصولہ اطلاعات کے مطابق یہاں پر جنین سے نابلس جانے والی شاہراہ پر اسرائیلی فوج نے ھنگامی چیک پوسٹ بنا کر شہریوں کو تنگ کرنا شروع کر دیا۔ چیک پوسٹ سے گزرنے والی گاڑیوں کی سخت تلاشی لی جاتی رہی۔