مقبوضہ بیت المقدس کے مشرقی السواحرہ ٹاؤن میں آئے روز دھاوا بول کر شہریوں کو زدوکوب کرنے والی اسرائیلی فوج کو اس وقت شدید مزاحمت کا سامنا کرنا پڑا جب اس مرتبہ شاہراہ القدس یونیورسٹی پر گھات لگا کر بیٹھے فلسطینی نوجوانوں نے اس پر پتھراؤ شروع کردیا۔
الشیاح چیک پوسٹ سے اس علاقے میں گھسنے والے صہیونی اہلکاروں پر پٹرول بم برسائے گئے جس کے بعد دونوں طرف سے باقاعدہ جھڑپیں شروع ہوگئیں۔
اسرائیلی فوج نے جوابی حملے میں نوجوانوں پر اندھا دھند فائرنگ کی۔ نوجوانوں پر شیلنگ کی گئی اور ربڑ کی گولیاں بھی برسائی گئیں۔
یاد رہے کہ گزشتہ کئی ہفتوں سے اسرائیلی فوج یومیہ بنیادوں پر ابو دیس اور الغزیریہ کے ٹاؤنز پر ہلہ بول رہی تھی۔ دوسری جانب اسرائیلی میڈیا بھی اسرائیلی فورسز کو ان علاقوں میں حملوں پر اکسا رہی تھی۔ میڈیا کی جانب سے مسلسل پروپیگنڈا کیا جارہا ہے یہ علاقے چھوٹی غزہ کی پٹی بن چکے ہیں اور یہاں سے اسرائیلی تسلط ختم ہوتا جا رہا ہے۔
اطلاعات کے مطابق اسرائیلی فوج نے ایک فلسطینی نوجوان کو گرفتار بھی کیا، تاہم اشدود کے علاقے سے گرفتار کیا گیا یہ نوجوان فرار ہونے میں کامیاب ہو گیا۔
بشکریہ:مرکزاطلاعات فلسطین