جنین – (فلسطین نیوز۔مرکز اطلاعات) اسرائیل کی ایک فوجی عدالت نے جیل میں رواں سال کے آغاز سے پابند سلاسل اسلامی تحریک مزاحمت ’حماس‘ کے رہنما الشیخ نزیہ ابو عون کو رہا کرنے کا حکم دیا ہے۔
فلسطین نیوز کو موصول ہونے والی اطلاعات کے مطابق مقبوضہ مغربی کنارے کے شہر جنین میں قائم اسرائیل کی ’’سالم‘‘ فوجی عدالت نے گذشتہ روز ابو عون کے کیس کی سماعت کے بعد ان کی رہائی کا حکم دیا۔رپورٹ کے مطابق ابو عون کو اسرائیلی فوج نے رواں سال کے آغاز میں حراست میں لیا تھا اور انہیں انتظامی قید میں ڈال دیا گیا تھا۔ حال ہی میں فوج نے ان کے بارے میں عدالت میں ایک خفیہ رپورٹ بھی پیش کی تھی جس کے بعد عدالت نے ان کی رہائی کا حکم دیا ہے۔ توقع ہے کہ انہیں جلد ہی رہا کردیا جائے گا۔
خیال رہے کہ نزیہ ابو عون کا تعلق حماس سے ہے اور وہ غرب اردن کے شہر جنین کے رہائشی ہیں۔ یہ ان کی پہلی اسیری نہیں بلکہ وہ اب تک 15 سال تک اسرائیلی عقوبت خانوں میں قید کاٹ چکے ہیں۔