اسرائیلی جیلوں میں قید فلسطینی پارلیمنٹ کے متعدد ارکان رہا

اسرائیلی جیلوں میں بغیر کسی الزام کے انتظامی حراست میں ڈالے گئے  متعدد  فلسطینی ارکان پارلیمنٹ  کو رہا کردیا گیا ہے۔ ان کی رہائی الظاھریہ اور عوفر فوجی چوکیوں سے کی گئی۔ جس کے بعد وہ اپنے اپنے گھروں میں پہنچ گئے ہیں۔

مرکز اطلاعات فلسطین کے مطابق سابق وزیر مالیات اور رکن پارلیمنٹ عمر عبدالرزاق کو جنوبی الخلیل کی الظاھریہ چیک پوسٹ سے رہا کیا گیا جس کے بعد وہ اپنے آبائی شہرسلفیت روانہ ہوگئے ہیں۔

ڈاکٹر الرزاق کو صہیونی فوج کی جانب سے جون 2014 ء میں حراست میں لیا گیا تھا۔ انہیں دو مرتبہ انتظامی حراست کی سزا سنائی گئی تھی۔

الخلیل سے تعلق رکھنے والے رکن پارلیمنٹ شریف سعدی القواسمی اور اسی شہر کے ایک دوسرے اسیر سعید ابو حسین کو دو سال کی قید کے بعد عوفر چوکی سے رہا کیا گیا۔

فلسطینی رکن پارلیمنٹ الشیخ فضل حمدان کو دو روز قبل چار ماہ کی انتظامی حراست کے بعد رہا کیا گیا تھا۔ آج منگل کو ایک دوسرے فلسطینی رکن پارلیمنٹ ڈاکٹر ابراہیم ابو سالم کی رہائی کا بھی امکان ہے۔ ابو سالم شمالی بیت المقدس کے بیر نبالا قصبے سے تعلق رکھتے ہیں اور پچھلے چھ ماہ سے اسرائیلی جیل میں قید ہیں۔

بشکریہ:مرکزاطلاعات فلسطین