فلسطین میں انسانی حقوق کے لیے سرگرم ایک تنظیم نے انکشاف کیا ہے کہ اسرائیل "فلسطینیوں کو صہیونی ریاست میں شامل نہ کرنے کے” ایک ظالمانہ قانون کی آڑ میں ایک لاکھ فلسطینیوں کو بیت المقدس سےنکال باہر کرنے کی سازش کر رہا ہے۔
انسانی حقوق کی تنظیم کا کہنا ہے کہ حال ہی میں اسرائیلی عدالتوں میں اسرائیلی ریاست کی شہریت کے لیے دی گئی فلسطینیوں کی تمام درخواستوں کو مسترد کر دیا گیا ہے۔ درخواست کے مسترد کیےجانے کا صاف صاف مطلب یہ ہے کہ ان فلسطینیوں کی بیت المقدس میں کوئی جگہ نہیں ہے،اسرائیل انہیں اپنا شہری تسلیم کرنے سے انکار کر رہا ہے اور انہیں لا محالہ آج نہیں تو کل مقبوضہ بیت المقدس سے نکلنا ہو گا۔
مرکزاطلاعات فلسطین کے مطابق انسانی حقوق کی تنظیم” سماجی و اقتصادی حقوق برائے اہالیان القدس” کی جانب سے جاری ایک رپورٹ میں بتایا گیا ہے کہ اسرائیل نے سنہ 1993ء کے بعد سے مقبوضہ علاقوں بالخصوص مقبوضہ بیت المقدس کے عرب شہریوں کو اپنا شہری تسلیم کرنے کے لیے دی جانے والی درخواستیں التواء میں ڈال رکھی تھیں۔ رواں ماہ گیارہ جنوری کو اسرائیلی سپریم کورٹ میں دائر کی گئی ان ہزاروں درخواستوں کو مسترد کر دیا گیا جن میں شہریوں نے اپنی اسرائیلی شہریت کے لیے درخواست دی تھی۔
انسانی حقوق گروپ کاکہنا ہے کہ اسرائیل سنہ 1967ء کی چھ روزہ عرب اسرائیل جنگ کے بعد سے اب تک مقبوضہ بیت المقدس کے 14561 فلسطینیوں کو بیت المقدس کی شہریت سے محروم کر چکا ہے جس کے بعد ان فلسطینیوں کو اپنے خاندانوں اور بچوں کے ہمراہ شہر سے جبری بے دخل کر دیا گیا، جو اسکے بعد مقبوضہ مغربی کنارے اور دیگر علاقوں میں قائم مہاجر کیمپوں میں رہنے پر مجبور ہیں۔
انسانی حقوق کی تنظیم نے اسرائیلی ریاست کے اس ظالمانہ طرز عمل کی شدید مذمت کرتے ہوئے اسےانسانی حقوق کے بین الاقوامی اصولوں کی سنگین خلاف ورزی قرار دیا ہے۔ انسانی حقوق گروپ نے عالمی برادری سے مطالبہ کیا ہے کہ وہ فوری طور پر مداخلت کرے اور بیت المقدس کے لاکھوں شہریوں کے مستقبل کو محفوظ بنانے کے لیے ان کے ساتھ تعاون کرے ورنہ اسرائیل جلد اپنے کالے اور ظالمانہ قوانین کی آڑ میں ایک لاکھ فلسطینیوں کو ان کے گھربار سے محروم کر دے گا۔