غزہ – (فلسطین نیوز۔مرکز اطلاعات) غزہ کی سیکیورٹی فورسز نے مصر کے سرحدی علاقے میں دہشت گردی کی کارروائیوں کے بعد مصر غزہ سرحد پر سیکیورٹی مزید سخت کردی ہے۔
فلسطین نیوز کو موصول ہونے والی اطلاعات کے مطابق غزہ میں داخلی سیکیورٹی کے ڈائریکٹر جنرل، میجر جنرل توفیق ابو نعیم نے ایک بیان میں بتایا گیا کہ "مصری فوجیوں پر حملے کی اطلاع پہنچنے کے فورا بعد کسی بھی اسمگلنگ آپریشن کو روکنے کے لئے حفاظتی انتظامات سخت کردئیے ہیں۔"
اس بیان کے بعد ابو نعیم کی سربراہی میں ایک سیکیورٹی میٹنگ منعقد کی گئی جس میں جنوبی سرحد پر موجود تمام سیکیورٹی اور فوجی اداروں کے افسران نے شرکت کی۔
ابو نعیم کا کہنا تھا کہ مصر کے ساتھ سرحد پر تمام اہلکار الرٹ ہیں۔ اس موقع پر فلسطینی افسر نے مصری فوج کے اہلکاروں کے جانوں کے ضیاع پر افسوس کا اظہار کیا۔