خان یونس – (فلسطین نیوز۔مرکز اطلاعات) اسلامی تحریک مزاحمت ’حماس‘ کے ایک دیرینہ رکن، سرکردہ عالم دین اور فلسطینی مجاھدین کے سرخیل اور مربی الشیخ سلیمان الفرا گذشتہ روز غزہ میں 67 سال کی عمر میں انتقال کرگئے۔
فلسطین نیوز کو موصول ہونے والی اطلاعات کے مطابق حماس کی جانب سے جاری کردہ بیان میں کہا گیا ہے کہ الشیخ سلیمان الفراء کی موت دل میں تکلیف سے ہوئی تاہم وہ گذشتہ کچھ عرصے سے علیل تھے۔
حماس نے الشیخ سلیمان الفرا کے انتقال پر گہرے دکھ اور افسوس کا اظہار کیا ہے۔ بیان میں کہا گیا ہے کہ مرحوم نہ صرف غزہ کی پٹی اور خان یونس بلکہ فلسطین کے جید عالم دین، فلسطینی مزاحمتی قوتوں کے روحانی پیشوا اور ایک مخلص فلسطینی رہنما تھے۔ ان کے انتقال سے فلسطینی قوم ایک دیرینہ عالم دین اور مزاحمتی رہنما سے محروم ہوگئی ہے۔
بیان میں کہا گیا ہے کہ الشیں سلیمان نصراللہ الفرا کی پوری زندگی دین اسلام کی اشاعت اور عملی جہاد میں گذری۔ وہ ایک عالم با عمل تھے اور فلسطینی مجاھدین کے لیے نمونہ عمل تھے۔ ان کے تربیت یافتہ فلسطینی زندگی کے تمام شعبوں میں خدمات انجام دیتے ہیں۔