طولکرم – (فلسطین نیوز۔مرکز اطلاعات) اسرائیلی حکام کی طرف سے بتایا گیا ہے کہ دو ہفتے قبل شہید کیے گئے 17 سالہ فلسطینی لڑکے کا جسد خاکی آج جمعہ کی شام اس کے ورثاء کے حوالے کیا جائے گا۔
فلسطین نیوز کو موصول ہونے والی اطلاعات کے مطابق اسرائیلی فوج کے سول امور سے متعلق حکام نے بتایا ہے کہ غرب اردن کے شمالی شہر طولکرم سے تعلق رکھنے والے شہید قتیبہ زھران کا جسد خاکی آج جمعہ کی شام اس کے ورثاء کے حوالے کیا جائے گا۔
صہیونی حکام کا کہنا ہے کہ شہید کا جسد خاکی رات کی تاریکی میں چیک پوسٹ 104 پراس کے ورثاء کو دیا جائے گا تاکہ اس موقع پر زیادہ تعداد میں فلسطینی جمع نہ ہوسکیں۔
خیال رہے کہ قتیبہ زھران کو اسرائیلی فوج نے دو ہفتے قبل زعترہ فوجی چوکی کے قریب گولیاں مار کر شہید کردیا تھا۔ صہیونی فوج نے دعویٰ کیا تھا کہ زھران نے اسرائیلی فوجیوں پر چاقو سے حملے کی کوشش کی تھی تاہم صہیونی دشمن اپنے اس دعوے کو ثابت نہیں کرسکے ہیں۔