مقبوضہ بیت المقدس (فلسطین نیوز۔مرکز اطلاعات) مقبوضہ فلسطین کے علاقے پر قائم غیر قانونی صیہونی بستی کیسوفیم کی زرعی زمین پر فلسطینی مزاحمت کاروں کی جانب سے چھوڑی جانے والی آتشی پتنگوں کے باعث دو مقامات پر آگ بھڑک اٹھی۔
فلسطین نیوز کو موصول ہونے والی اطلاعات کے مطابق اسرائیل کے فائر فائٹر ہفتے کی دوپہر سے اس آگ کو بجھانے کو کوشش میں مصروف ہیں۔غزہ سے ملحقہ علاقوں میں موجود اسرائیلی صیہونی بستیوں نے واپسی مارچ کے شرکاء کی جانب سے آتشی پتنگیں گرائے جانے کے باعث بڑے نقصانات اٹھائے ہیں۔
اسی تناظر میں اسرائیل کے ایک مقامی اخبار اسرائیل ہیوم کے مطابق تین فلسطینی نوجوانوں نے غزہ کی سرحد عبور کر کے اسرائیلی فوجی سامان کو نقصان پہنچانے کی کوشش کی۔
عینی شاہدین کے مطابق اسرائیلی فوج کی فائرنگ کے بعد فلسطینی نوجوان کامیابی سے واپس آنے میں کامیاب ہوگئے تھے۔