مقبوضہ بیت المقدس – (فلسطین نیوز۔مرکز اطلاعات) صہیونی ریاست نے مقبوضہ بیت المقدس کے فلسطینی باشندوں پر دیگر شعبوں میں عرصہ حیات تنگ کرنے کے بعد اب انہیں کاروبار کی دنیا سے باہر کرنے کا ایک نیا حربہ اختیار کیا ہے۔ صہیونی ریاست طاقت کے بل بوتے پر جب فلسطینی تاجروں کو کاروبار سے محروم کرنے میں بری طرح رہا تو اب فلسطینی تاجروں پرٹیکسوں کا بھاری بوجھ ڈالا جا رہا ہے۔ فلسطینی تاجروں نے صہیونی حکومت کی طرف سے مسلط کردہ نئے ٹیکسوں کو بلا جواز اور سازش قرار دیتے ہوئے مسترد کردیا ہے۔
فلسطین نیوز کو موصول ہونے والی اطلاعات کے مطابق ایک مقامی فلسطینی ذرائع نے بتایا کہ اسرائیلی بلدیہ کے ٹیکس حکام نے شاہراہ الواد، باب خان آئل مارکیٹ اور دوسرے بازاروں میں فلسطینی دکانوں پر چھاپے مارے۔اس موقع پر اسرائیلی فوج اور پولیس کی بھاری نفری بھی موجود تھی۔
صہیونی حکام نے کئی دکانوں کو بند کرنے کا حکم دیا اور انہیں نام نہاد وجوہات کی بناء پر جرمانے بھی کیے گئے۔ اس موقع پر انہیں نئے ٹٰیکسوں کی لسٹیں تھمائی گئی ہیں۔ مقامی تاجروں کاکہنا ہےکہ صہیونی حکام کی طرف سے انہیں زدوب کیے جانے کا مقصد نئے اور ظالمانہ ٹیکسوں کا بوجھ ڈالنا ہے۔