(فلسطین نیوز۔مرکز اطلاعات) فلسطینیوں نے غرب اردن میں اجتماعات کرکے صیہونی جیلوں میں بند فلسطینی قیدیوں کی حمایت کا اعلان کیا ہے۔
فلسطین نیوز کو موصول ہونے والی اطلاعات کے مطابق ہزاروں فلسطینیوں نے غرب اردن کے مختلف شہروں میں اجتماع کرکے فوری طور پر محمد اور محمود البلبول کی رہائی کا مطالبہ کیا ہے۔ یہ اجتماعات بیت لحم، قلقیلیا، الخلیل اور رام اللہ میں ہوئے۔ رام اللہ میں فلسطینیوں نے ریڈ کراس کے دفترکے سامنے مظاہرہ کیا۔مظاہرین نے فلسطینیوں کے خلاف صیہونی حکومت کے جرائم پرعالمی برادری کی خاموشی کی بھی مذمت کی۔ فلسطین کی انسانی حقوق تنظیم الضمیر کے مطابق گذشتہ جولائی تک صیہونی حکومت کی جیلوں میں سات ہزار فلسطینی قید تھے جن میں ساڑھے سات سو کو بلاجواز دوبارہ قید کردیا گیا ہے۔
ادھر اطلاعات ہیں کہ شرپسند صیہونی آباد کاروں نے ایک بار پھر مسجد الاقصی پرحملہ کیا ہے۔ رپورٹ کے مطابق دسیوں صیہونی آبادکاروں نے جمعرات کی صبح صیہونی فوجیوں کی حمایت سے مسجدالاقصی پر حملہ کیا۔ صیہونی آباد کاروں نے مسجدالاقصی کی بے حرمتی کرنے کے بعد مسلمانوں کے خلاف اشتعال انگیز نعرے لگائے۔