الخلیل – (فلسطین نیوز۔مرکز اطلاعات) فلسطین کے مقبوضہ مغربی کنارے کے شہر الخلیل میں صہیونی شرپسندوں کی طرف سے رات کو انسانی حقوق کی تنظیم ریڈ کراس کے مقامی دفتر پرحملہ کرکے دفتر کی توڑپھوڑ کی۔ دوسری طرف ریڈ کراس نے اس حملے کی شدید الفاظ میں مذمت کی ہے۔
فلسطین نیوز کو موصول ہونے والی اطلاعات کے مطابق ریڈ کراس کی طرف سے جاری کردہ ایک بیان میں کہا گیا ہے کہ رات کے وقت مسلح افراد نے الخلیل میں واقع تنظیم کے مقامی دفتر پردھاوا بولا، دفتر میں فائرنگ کی گئی اور توڑپھوڑ کے بعد دفتر کو آگ لگا دی جس کے نتیجے میں دفتر میں موجود قیمتی سامان اور ریکارڈ جل کر راکھ ہوگیا۔الخلیل میں ریڈ کراس کے انچارج گیراڈو مولزنیک نے میڈیا سے بات کرتے ہوئے بتایا کہ وہ حملہ آوروں کی شناخت نہیں کرسکے ہیں۔ یہ حملہ فلسطینی علاقوں میں تنظیم کے دفاتر میں خوف و ہراس پھیلانے کی مجرمانہ کوشش ہے اور ہم اس کی شدید الفاظ میں مذمت کرتے ہیں۔
خیال رہے کہ الخلیل شہر میں ریڈ کراس کا دفتر سنہ 1979ء سے قائم ہے۔ یہ تنظیم سنہ 1967ء سے بھی پہلے سے فلسطین میں انسانی حقوق کی صورت حال کے لیے موجود تھی اور گذشتہ پچاس سال سے یہ تنظیم فلسطین میں خدمات انجام دے رہی ہے۔
مبینہ طور پر صہیونی شرپسندوں کی طرف سے ماضی میں بھی ریڈ کراس کے عملے اور دفاتر کوانتقامی کارروائیوں کا نشانہ بنایا گیا ہے۔