الخلیل (فلسطین نیوز۔مرکز اطلاعات) اسرائیلی فوج نے فلسطین کے مقبوضہ مغربی کنارے کے جنوبی شہر الخلیل میں ایک فلسطینی نوجوان کو مسجد ابراہیمی کے قریب گولیاں مار کر شہید کردیا۔
فلسطین نیوز کو موصول ہونے والی اطلاعات کے مطابق اسرائیلی فوج نے دعویٰ کیا ہے کہ فلسطینی نوجوان نے اپنی گاڑی کی ٹکر سے اسرائیلی فوجیوں کو ہلاک کرنے کی کوشش کی جس پر فوج کو جوابی کارروائی کرنا پڑی۔قبل ازیں یہ اطلاعات آئی تھیں کہ الخلیل میں ایک صیہونی آباد کارنے ایک فلسطینی نوجوان پر فائرنگ کی جس کے نتیجے میں وہ زخمی ہوگیا۔
ہلال احمر فلسطین کے مطابق اسرائیلی فوج نے شہید ہونے والے فلسطینی کا جسدخاکی قبضے میں لے لیا ہے اور جائے وقوعہ کی طرف کسی کو جانے کی جازت نہیں دی گئی۔
ادھر فلسطینی وزارت صحت نے ایک بیان میں بتایا کہ اسرائیلی فوجیوں نے 35 سالہ رامی وحید ھسین صبارنہ کو گولیاں مار کر شہید کردیا۔ وزارت صحت کے مطابق فلسطینی شہری کو حارہ جابر کے مقام پر اس وقت گولیاں ماری گئیں جب وہ چھوٹا بلڈوزر چلا رہا تھا۔
شہید فلسطینی دو بچوں کا باپ ہے۔