غزہ (فلسطین نیوز۔مرکز اطلاعات) صیہونی فوج نے فلسطین کے مقبوضہ مغربی کنارے اور غزہ کی پٹی کے درمیان بیت حانون گذرگاہ سے جمعہ کی شام ایک فلسطینی تاجر کو حراست میں لینے کے بعد نامعلوم مقام پر منتقل کردیا۔
فلسطین نیوز کو موصول ہونے والی اطلاعات کے مطابق فلسطینی محکمہ امور اسیران کے چیئرمین عبدالناصر فروانہ کا کہنا ہے کہ صیہونی فوج نے غزہ کی پٹی کے رہائشی ایک کاروباری شخصیت محمد احمد الاسطل کو حراست میں لینے کے بعد نامعلوم مقام پر منتقل کردیا۔فروانہ نے بتایا کہ الاسطل اپنے کاروباری کاموں کے لیے غزہ سے غرب اردن جا رہے تھے کہ انہیں بیت حانون گذرگاہ پر روک لیا گیا۔ اس کے بعد ان کے ساتھ کوئی رابطہ نہیں ہوسکا ہے۔ صیہونی حکام سے رابطہ کرنے پر معلوم ہوا کہ انہیں حراست میں لینے کے بعد نامعلوم مقام پر لے جایا گیا ہے۔
انسانی حقوق کے مندوب کا کہنا ہے کہ فلسطینی تاجر کو حراست میںÂ لیے جانے کی وجہ معلوم نہیں ہوسکی ہے۔
خیال رہے کہ رواں سال بیت حانون گذرگاہ سے اب تک 8 فلسطینیوں کو رواں سال حراست میں لیا گیا جب کہ پچھلے سال 17 فلسطینیوں کو بیت حانون گذرگاہ سے گرفتار کیا گیا۔