خان یونس – (فلسطین نیوز۔مرکز اطلاعات) اسرائیلی فوج نے فلسطین کے علاقے غزہ کی پٹی میں متعدد مقامات پر بھاری توپ خانے سے شدید گولہ باری کی ہے جس کے نتیجے میں متعدد مکانات تباہ ہوگئے ہیں۔
فلسطین نیوز کو موصول ہونے والی اطلاعات کے مطابق اسرائیلی فوج نے جمعہ کو علی الصباح مشرقی خان یونس، دیر البلح،جنوبی اور وسطی غزہ میں بھاری توپ خانے سے گولہ باری کی۔مقامی فلسطینی ذرائع نے بتایا کہ غزہ کی قریب کیسوفیم فوجی کیمپ میں متمرکز اسرائیلی فوجیوں نے مشرقی خان یونس میں متعدد مقامات پر گولے داغے۔ کچھ گولے دیر البلح کی آبادی میں گرے جب کہ خان یونس میں زرعی اراضی میں گولے گرے۔
مقامی فلسطینی شہریوں کا کہنا ہے کہ صہیونی فوج نے جنوبی اور مشرقی غزہ میں گولے داغے جس کے نتیجے میں متعدد مکانات کو نقصان پہنچا ہے۔