(فلسطین نیوز۔مرکز اطلاعات) صہیونی فوج کی ریاستی دہشت گردی کے نتیجے میں آج جمعہ کے روز مزید دو فلسطینی شہید اور متعدد زخمی ہوگئے۔
فلسطین نیوز کو موصول ہونے والی اطلاعات کے مطابق قابض صہیونی فوجیوں نے فلسطین کے مقبوضہ مغربی کنارے کے جنوبی شہر الخلیل میں ’کریات اربع‘ یہودی کالونی کے قریب فلسطینی میاں بیوی کو گولیاں مار دیں جس کے نتیجے میں فلسطینی شہری شہید اور اس کی اہلیہ شدید زخمی ہوگئی۔ صہیونی فوج نے حسب معمول دعویٰ کیا ہے کہ فلسطینیوں کو گولیاں اس وقت ماری گئیں جب انہوں نے یہودی فوجیوں پر چاقو سے حملے کی کوشش کی تھی تاہم صہیونی فوج کے اس دعوے کی تصدیق نہیں ہوسکی ہے۔رپورٹ کے مطابق کریات اربع کے قریب اسرائیلی فوجیوں نے ایک مشکوک فلسطینی کار پرفائرنگ کی جس کے نتیجے میں کار میں سوار دو افراد زخمی ہوگئے۔ بعد ازاں ان میں سے ایک زخموں کی تاب نہ لاتے ہوئے دم توڑ گیا۔ زخمی ہونے والی دوسری خاتون ہیں جس کی حالت تشویشناک بیان کی جاتی ہے۔ صہیونی فوج نے زخمی خاتون کو حراست میں لے لیا ہے۔
ویب سائیٹ پر پوسٹ خبر میں بتایا ہے کہ فوج کا کہنا ہے کہ دونوں فلسطینی میاں بیوی فدائی حملے کی تیاری کررہے تھے۔
مقامی ذرائع کے حوالے سے بتایا ہے کہ اسرائیلی فوج کی ریاستی دہشت گردی کے نتیجے میں شہید ہونے والے فلسطینی شہری کی شناخت فراس موسیٰ البیروای الخضور کے نام سے کی گئی ہے۔ اس کا تعلق مشرقی الخلیل کے بنی نعیم قصبے سے ہے۔ شہید کی بیوہ رغدہ الخضور شدید زخمی ہیں۔ رغدہ کی ایک بہن مجد الخضور رواں سال ماہ صیام میں اسرائیلی فوج کی دہشت گردی کے نتیجے میں جام شہادت نوش کرچکی ہے۔
قبل ازیں جمعہ کے روز مقبوضہ بیت المقدس میں باب العامود کے مقام پر اسرائیلی پولیس نے ایک فلسطینی نوجوان پر گولیاں ماریں جس کے نتیجے میں وہ جام شہادت نوش کرگیا۔ صہیونی فورسز کا کہنا ہے کہ فلسطینی نوجوان کو فدائی حملے کی کوشش کے دوران گولی ماری گئی۔ عبرانی اخبار’معاریو‘ کی ویب سائیٹ کے مطابق فلسطینی نوجوان کے پاس ایک چاقو تھا جس کی مدد سے اس نے اسرائیلی بارڈر فورس کے اہلکاروں پرحملے کی کوشش کی تھی۔
عینی شاہدین کا کہنا ہے کہ شہید ہونے والا شہری اردنی نژاد ہے۔ اسرائیلی پولیس کی خاتون ترجمان لوبا السمری کاکہنا ہے کہ اردنی نژاد ایک 28 سالہ فلسطینی النبی پل عبور کرکے بیت المقدس داخل ہوا اور وہ یہودی فوجیوں پرحملے کی کوشش کررہا تھا۔ شہید ہونے والے نوجوان کا جسد خاکی اسرائیلی فوج نے قبضے میں لے لیا ہے۔ اس کی مزید شناخت نہیں کی جاسکی ہے۔