رام اللہ – (فلسطین نیوز۔مرکز اطلاعات) فلسطینی اتھارٹی کے سربراہ محمود عباس نے ایک صدارتی فرمان کے ذریعے جسٹس سامی صرصور کی جگہ جسٹس عماد سلیم اسعد عبداللہ سعد کو سپریم کورٹ کا نیا چیف جسٹس مقرر کیا ہے۔
فلسطین نیوز کو موصول ہونے والی اطلاعات کے مطابق صدر عباس نے اپنے مقرب عہدیداروں سے صلاح مشورے کے بعد جسٹس عماد سلیم عبداللہ کو جوڈیشل کونسل کا چیئرمین اور سپریم کورٹ کا نیا چیف جسٹس مقرر کیا ہے۔خیال رہے کہ فلسطینی صدر محمود عباس نے بعض اختلافات کی بناء پر 12 اکتوبر کو جسٹس سامی صرصور کو سپریم کورٹ کے چیف جسٹس کے عہدے سے ہٹا دیا تھا۔ ان کی جگہ جسٹس عماد سلیم کو قائم مقام چیف جسٹس مقرر کیا گیا تھا۔
فلسطینی انسانی حقوق کی تنظیموں اور شہری حقوق پرنظر رکھنے والے گروپوں نے 24 اکتوبر کو انکشاف کیا تھا کہ جسٹس سامی صرصور سے ان کےحلف اٹھانے سے قبل ہی ان سے استعفیٰ لے لیا تھا۔