تیسری تحریک انتفاضہ سر پرکھڑی ہے، بچنے کا کوئی امکان نہیں: اولمرٹ

فلسطین میں صہیونی جبرو تسلط کے خلاف تیسری تحریک انتفاضہ کو نوشتہ دیوار قرار دینے والوں میں مسلسل اضافہ ہو رہا ہے۔ سابق وزیراعظم ایہود اولمرٹ نے بھی خبردار کیا ہے کہ فلسطینیوں کی تیسری تحریک انتفاضہ اسرائیلی سرحد پرپہنچ چکی ہے۔ اسرائیل کا اس سے بچنے کا کوئی راستہ باقی نہیں رہا ہے۔

ایہود اولمرٹ نے ان خیالات کا اظہار مقبوضہ بیت المقدس میں وکلاء یونین کے زیراہتمام ایک تقریب سے خطاب میں کیا۔ انہوں نے کہا کہ فلسطینی ذہنی، جسمانی، مادی اور معنوی طورپر تیسری تحریک انتفاضہ شروع کرنے کے لیے تیار ہیں۔ مغربی کنارا اس تحریک کا نیا بیس کیمپ ثابت ہوگا۔ انہوں نے کہا کہ مغربی کنارے میں اسرائیل کے خلاف تحریک کے لیے فضاء تیار ہوچکی ہے۔ تحریک انتفاضہ کا آتش فشاں کسی بھی وقت پھٹ سکتا ہے۔ مغربی کنارے میں حالات اسرائیلی فوج کے کنٹرول سے نکلتے جا رہے ہیں۔