بیت لحم – (فلسطین نیوز۔مرکز اطلاعات) اسرائیلی جیل میں بھوک ہڑتالی فلسطینی اسیران سے یکجہتی کے اظہار مقبوضہ مغربی کنارے کے جنوبی مغربی شہر بیت لحم میں فلسطینیوں نے مشعل بردار ریلی نکالی۔
فلسطین نیوز کو موصول ہونے والی اطلاعات کے مطابق یکجہتی مارچ کے شرکاء نے المھد کمپلیکس کے سامنے جلسہ کیا اور بعد میں انہوں نے ہاتھوں میں مشعلیں اٹھائے کنیسہ المھد (چرچ آف نیٹیوٹی) کے صدر دروازے تک مارچ کیا۔مظاہرین سے خطاب کرتے ہوئے فلسطینی اتھارٹی Â میں اسیران امور کے سربراہ عیسی قراقع نے بھوک ہڑتالی قیدیوں کی تازہ ترین صورتحال پر روشنی ڈالی۔ انہوں نے بتایا کہ اعلی اسرائیلی حکام نے بھوک ہڑتالی اسیران کے مطالبات پر غور کے سلسلے میں رابطے کئے ہیں۔
عيسى قراقع کا مزید کہنا تھا بھوک ہڑتالی قیدی اپنے مطالبات کی منظوری تک جدوجہد جاری رکھنے کے لیے پرعزم ہیں۔
پندرہ سو فلسطینی اسیران نے 17 اپریل سے اپنے بنیادی حقوق منوانے کے لئے غیر معینہ مدت کے لئے بھوک ہڑتال شروع کی تھی۔ بعد ازاں مزید قیدی بھی اس ہڑتال میں شامل ہوتے گئے۔