غزہ – (فلسطین نیوز۔مرکز اطلاعات) اسرائیلی حکام نے انتظامی حراست کی ظالمانہ پالیسی کے تحت پابند سلاسل اسلامی تحریک مزاحمت ’حماس‘ کے رہنما نادر مصطفیٰ محمد صوافطہ کی انتظامی قید میں تیسری بار چار ماہ کی توسیع کی ہے۔
فلسطین نیوز کو موصول ہونے والی اطلاعات کے مطابق اسیران فلسطین اسٹڈی سینٹر کے شعبہ اطلاعات کی ترجمان امینہ طویل نےÂ بتایا کہ نادر صوافطہ کو اسرائیلی فوج نے 15 نومبر 2016ء کو حراست میں لیا تھا۔ انہیں پہلے مرحلے میں چھ ماہ انتظامی قید کی سزا سنائی گئی تھی۔ بعد ازاں ان کی انتظامی حراست میں مزید چھ ماہ کی توسیع کردی گئی تھی۔ دوسری بار انتظامی قید میں توسیع کی مدت ختم ہونے سے قبل ہی ان کی مدت حراست میں مزید چار ماہ کی توسیع کردی گئی ہے۔نادر صوافطہ کی یہ پہلی اسیری نہیں بلکہ وہ 15 سال تک اسرائیلی جیلوں میں قید کاٹ چکے ہیں۔ وہ اس وقت اسرائیل کی صحرائی جیل النقب میں پابند سلاسل ہیں۔ ان کے بچوں اور اہلیہ کو ان سے ملنے کی اجازت نہیں دی جا رہی ہے۔