الخلیل – (فلسطین نیوز۔مرکز اطلاعات) اسرائیلی فوج کی جانب سے جاری کردہ بیانات میں کہا گیا ہے کہ گذشتہ روز فوج کے بغیر پائلٹ دو ڈرون طیارے فلسطین کے دریائے اردن کے مغربی کنارے کے شہروں الخلیل اور بیت لحم میں گر کر تباہ ہوگئے۔
فلسطین نیوز کو موصول ہونے والی اطلاعات کے مطابق اسرائیل کے عبرانی ریڈیو نے فوج کی جانب سے جاری کردہ ایک بیان کے حوالے سے بتایا کہ غرب اردن کے جنوبی شہروں الخلیل اور بیت لحم میں دو ڈرون طیارے’اسکائی رائیڈر‘ کسی فنی خرابی کے باعث گر کر تباہ ہوگئے ہیں۔فلسطینی عینی شاہدین کا کہنا ہے کہ الخلیل شہر میں اسرائیل کا ایک ڈرون طیارہ الزعتری اسکول کے قریب گر کر تباہ ہوا۔
اسرائیلی اخبار ’معاریو‘ کے مطابق فوج نےتباہ ہونے والے ڈرون طیاروں کا ملبہ قبضے میں لے لیا ہے۔ فوج اور انٹیلی جنس اداروں کو خدشہ ہے کہ ڈرون طیاروں کے بارے میں حساس معلومات چوری کئی ہیں۔
رپورٹ کے مطابق ڈرون طیاروں کے حادثے کے بعد انفنٹری ڈویژن کے کمانڈر ’کوبی براک‘ نے ’اسکائی رائیڈر‘ ڈرون طیاروں کو اڑانے پر غیرمعینہ مدت تک روکنے کا فیصلہ کیا ہے۔ اسرائیلی فوج کا کہنا ہے کہ رواں سال کے دوران اب تک سات ’اسکائی رائیڈر‘ ڈرون طیارے تباہ ہوچکے ہیں۔