فلسطین میں انسانی حقوق کی تنظیموں کی رپورٹس میں بتایا گیا ہے کہ اسرائیلی جیلوں میں فلسطینی اسیران نے یہ بھوک ہڑتال قید تنہائی میں ڈالے گئے بھوک ہڑتالی فلسطینی نھار السعدی کے ساتھ اظہار یکجہتی کے طور پر شروع کی ہے۔ السعدی نے پچھلے تین ہفتوں سے اپنی قید تنہائی کےخلاف بھوک ہڑتال شروع کر رکھی ہے۔
مرکز اطلاعات فلسطین کے مطابق فلسطینی اتھارٹی کے شعبہ امور اسیران کی جانب سے جاری ایک بیان میں بتایا گیا ہے کہ صہیونی جیل انتظامیہ نے بھوک ہڑتالی اسیران کو دھمکی دی ہے کہ اگرا نہوں نے بھوک ہڑتال جاری رکھی تو انہیں سنگین جرائم میں ملوث قیدیوں کے ساتھ شامل کرکے دوسرے جیلوں میں ڈال دیا جائے گا۔ تاہم اسیران کی جانب سے صہیونی انتظامیہ کے دباو کو مسترد کردیا گیا ہے۔ اسیران نے واضح کیا ہے کہ وہ قیدیوں کو قید تنہائی میں ڈالے جانے کے خلاف احتجاج کا سلسلہ جاری رکھیں گے۔
فلسطینی محکمہ اسیران کا کہنا ہے کہ فلسطینی قیدیوں نے صہیونی جیل انتطامیہ پر واضح کیا ہے کہ اگر اس نے بھول ہڑتال ختم کرانے کے لیے کوئی انتقامی کارروائی کی تو اسرائیل کی تمام جیلوں کے ہر وارڈ میں بھوک ہڑتال شروع کی جائے گی۔
بیان میں بتایا گیا ہے کہ اسرائیلی فوج نے مختلف جیلوں میں 30 سے زائد فلسطینیوں کو قید تنہائی میں ڈال رکھا ہے جو کہ عالمی قوانین کی بھی سنگین خلاف ورزی ہے۔
بشکریہ:مرکزاطلاعات فلسطین