اسرائیلی فوجیوں کی فائرنگ،1 فلسطینی شہید، متعدد زخمی

(فلسطین نیوز۔مرکز اطلاعات) نہتے مظاہرین پر اسرائیلی فوج کی فائرنگ سے ایک فلسطینی نوجوان شہید اور پینتس سے زائد زخمی ہوگئے۔

فلسطین نیوز کو موصول ہونے والی اطلاعات کے مطابق غاصب اسرائیلی فوجیوں نے فوار کیمپ میں نہتے مظاہرین پر گولیاں چلا دیں جس میں ایک سترہ سالہ فلسطینی محمدابو ہشاش شہید ہوگیا۔فلسطینی حکام کا کہنا تھا کہ اس کے سینے میں گولی لگی تھی، جس سے وہ موقع پر ہی شہید ہوگیا۔صیہونی فوجیوں کی فائرنگ میں چالیس فلسطینی زخمی بھی ہوئے ہیں۔ فلسطین کی انجمن ہلال احمر نے بتایا ہے کہ صیہونی فوجیوں نے فوار کیمپ میں داخل ہو کر گولیاں چلائیں جس سے دس فلسطینی زخمی ہوئے، جس کے بعد سیکڑوں فلسطینی سڑکوں پر نکل آئے اور مظاہرہ کیا۔ اسرائیلی فوج نے مظاہرین پر براہ راست فائرنگ کی، جس کے نتیجے میں مزید پچیس فلسطینی زخمی ہوگئے۔مسجد الاقصی پر صیہونیوں کے حملوں اور بیت المقدس کے اسلامی تشخص کو مٹانے کی سازش کے خلاف مقبوضہ فلسطینی علاقوں میں مظاہروں اور صیہونیت مخالف کارروائیوں کا سلسلہ تیز ہوگیا ہے جسے تحریک انتفاضہ قدس کا نام دیا گیا ہے۔ یکم اکتوبر سے جاری اس تحریک کے دوران صہیونی فوجیوں کی فائرنگ میں دو سو تیس سے زائد فلسطینی شہید ہوچکے ہیں۔ فلسطینیوں کے جوابی حملوں میں کم سے کم پینتیس صیہونی بھی مارے گئے ہیں۔