اسرائیلی فوجی حکام نے مقبوضہ فلسطین کی وادی اردن کے شمال میں ابزیق کے مقام پر رہائش پذیر 25 فلسطینی خاندانوں کو اپنے گھربار چھوڑنے کا حکم دیا ہے۔
وادی اردن کی المالح کی دیہی کونسل کے چیئرمین عارف دراغمہ نے میڈیا کو بتایا کہ صہیونی فوج نے وادی ابزیق میں رہائش پذیر پچیس خاندانوں کو پیر علی الصباح مقامی وقت کے مطابق چھ بجے اپنے مکانات خالی کرنے کا حکم دیا ہے۔ صہیونی فوج کی جانب سے کہا گیا ہے کہ علاقے میں فوجی مشقیں شروع ہونے والی ہیں جن کی بناء پرمقامی شہریوں کو اپنے مکانات خالی کرنا ہوں گے۔دراغمہ نے بتایا کہ صہیونی فوج کی دھمکی کے بعد ابزیق کے 120 افراد اپنے گھربار چھوڑنے پر مجبور ہیں لیکن سخت سرد موسم میں انہیں کوئی متبادل ٹھکانہ بھی مہیا نہیں کیا گیا ہے۔ انہوں نے کہا کہ اسرائیلی فوج دانستہ طورپر مقامی شہریوں کو پریشان کرنے کے انہیں گھروں سے نکال رہی ہے۔
خیال رہے کہ فلسطین کی پرفضاء وادی اردن کئی سال سے صہیونی فوج کی جنگی مشقوں کا مرکز چلی آ رہی ہے۔ قابض فوج یہاں پر جنگی مشقوں کی آڑ میں مقامی فلسطینی آبادی کو علاقہ بدری پر مجبور کر رہی ہے۔