(فلسطین نیوز۔مرکز اطلاعات) اسرائیل کی ایک فوجی عدالت نے مقبوضہ مغربی کنارے کے جنوبی شہر الخلیل کی رہائشی ایک خاتون کو 20 ماہ قید با مشقت کی اور 2000 شیکل جرمانہ کی سزا سنائی ہے۔
رپورٹ کے مطابق منگل کے روز اسرائیل کی ’’عوفر‘‘ نامی ایک فوجی عدالت نے مغربی الخلیل کے نوبا قصبے سے تعلق رکھنے والی 30 سالہ احسان حسن الدبابسہ کو بیس ماہ قید اور دو ہزار شیکل جرمانہ کی سزا کا حکم دیا۔مقامی فلسطینی ذرائع کا کہنا ہے کہ فلسطینی خاتون اسیرہ کو منگل کے روز اسرائیل کی فوجی عدالت میں پیش کیا گیا۔ اسے 13 اکتوبر 2014 ء کو حراست میں لیا گیا تھا جہاں اس پر مقدمہ کا سلسلہ کئی ماہ تک جاری رہا ہے۔
خیال رہے کہ اسیرہ الدبابسہ اس سے قبل بھی دو سال تک اسرائیلی جیل میں قید رہ چکی ہیں۔ پچھلی بار قید کے دوران انہوں نے ’’دامون‘‘نامی جیل میں بھوک ہڑتال کردی تھی جس کے بعد اُنہیں رہا کردیا گیا تھا۔