اسرائیلی پولیس نے مسجد اقصیٰ کے تحفظ کے لیے جمع ہونے والے اٹھارہ فلسطینیوں کو حراست میں لے کر انہیں جیلوں میں ڈال دیا ہے۔
اسرائیلی ریڈیو کی رپورٹ کے مطابق گذشتہ چند روز سے یہودی آباد کاروں کی مسجد اقصیٰ میں آمد کے موقع پر سیکڑوں فلسطینی بھی مسجد اقصیٰ میں پہنچے۔ فلسطینیوں کی آمد کا مقصد قبلہ اول کو یہودیوں کے حملوں اور ان کی دست برد سے بچانا تھا، تاہم اس موقع پر تعینات صہیونی پولیس نے انہیں حراست میں لے کر جیلوں میں منتقل کر دیا ہے۔
اسرائیلی ریڈیو کی رپورٹ میں بتایا گیا ہے کہ چند روز پیشتر گرفتار کیے گئے بعض فلسطینیوں میں سے آٹھ کو سخت شرائط کے تحت رہا کیا گیا ہے جبکہ کئی کی مدت اسیری میں توسیع کر دی گئی ہے۔ جبکہ منگل اور بدھ کے ایام میں مزید اٹھارہ افراد کو حراست میں لیا گیا۔
خیال رہے کہ ان دنوں اسرائیل کے انتہا پسند یہودیوں کی جانب سے مسجد اقصیٰ پر حملوں میں اضافہ دیکھا گیا ہےاور پورے عالم اسلام کی جانب سے انتہا پسندوں کے حملوں کے خلاف شدید ردعمل سامنے آیا ہے۔
بشکریہ: مرکز اطلاعات فلسطین