ایک ماہ میں 17 ٹن صہیونی مصنوعات کی ضبط کے بعد تلفی

فلسطینی وزارت اقتصادیات کے حکام کی بروقت اور موثر کارروائی کے نتیجے میں ایک ماہ کے دوران مقبوضہ مغربی کنارے کی مارکیٹوں میں موجود ناکارہ اور جعلی نوعیت کی اسرائیلی مصنوعات کو غائب کردیا گیا ہے۔ فلسطینی حکام کی موثر کارروائی کے نتیجے میں بڑی مقدار میں اسرائیلی مصنوعات ضبط کی گئی ہیں۔
مرکز اطلاعات فلسطین کے مطابق وزارت اقتصادیات کی جانب سے جاری ایک رپورٹ میں بتایا گیا ہے کہ مغربی کنارے میں ایک ماہ کے دوران ضبط کی گئی کل ناکارا مصنوعات میں‌ صرف ایک اعشاریہ 09 فی صد مقامی فلسطینی مصنوعات ہیں باقی تمام اسرائیلی مصنوعات بتائی جاتی ہیں۔

رپورٹ کے مطابق صہیونی مصنوعات کے خلاف کارروائی کے دوران فلسطینی تاجر برادری نے بھی حکومت کا بھرپور ساتھ دیا ہے۔ اس کارروائی کے نتیجے میں جہاں اسرائیلی کی بے مقصد مصنوعات بازار سے ختم ہوئی ہیں وہیں فلسطینی مصنوعات کی طلب میں بھی اضافہ ہوا ہے۔ فلسطینی شہریوں کا اپنے کارخانوں میں تیار کردہ اشیاء پر اعتماد میں بھی غیرمعمولی اضافہ دیکھنے میں آیا ہے۔

رپورٹ کے مطابق ایک ماہ کے دوران حکام نے غیرقانونی طور پر فلسطینی مارکیٹوں تک اسمگل کی گئی 17 ٹن صہیونی مصنوعات ضبط کیں اور انہیں تلف کیا گیا۔

تلف کردہ اشیاء میں انسانی اور حیوانی خواراک، مشروبات، خام تیل، خوردنی تیل، کیمیائی مواد اور سامان نقل وحمل وغیرہ شامل ہیں۔