(فلسطین نیوز۔مرکز اطلاعات) اسرائیلی پولیس نے گذشتہ روز مقبوضہ بیت المقدس کی العیسویہ کالونی سے ایک پندرہ سالہ فلسطینی لڑکی کو حراست میں لیا ہے، جس پر الزام ہے کہ وہ یہودی فوجیوں پر چاقو سے حملے کی منصوبہ بندی کررہی تھی۔
رپورٹ کے مطابق اسرائیلی پولیس کی خاتون ترجمان لوبا السمری نے بتایا کہ پولیس نے العیسویہ کے داخلی راستے سے ایک فلسطینی لڑکی کو اس وقت حراست میں لیا جب اس کی تلاشی لی گئی تو اس کے قبضے سے ایک چاقو برآمد کیا گیا۔ دوران تفتیش لڑکی نے اعتراف کیا کہ وہ یہودی فوجیوں پر چاقو سے حملے کی تیاری کررہی تھی۔ترجمان کا کہنا تھا کہ فلسطینی لڑکی کو بغیر کسی مزاحمت کے گرفتار کیا گیا ہے۔ اس سےتفتیش جاری ہے۔
عینی شاہدین کا کہنا ہے کہ حراست میں لی گئی فلسطینی لڑکی کا تعلق العیسویہ کالونی سے ہے اور اس کا نام سند سمیر عبید بتایا جاتا ہے جس کی عمر پندرہ سال ہے۔ قبل ازیں قابض فوجیوں نے مغربی کنارے کے الخلیل شہر سے تل ارمیدہ کے مقام سے بھی ایک فلسطینی لڑکی کو حراست میں لیا تھا۔