(فلسطین نیوز۔مرکز اطلاعات) صہیونی فوج نے فلسطین کے مقبوضہ مغربی کنارے کے جنوبی شہر الخلیل میں مسجد ابراہیمی کے قریب سے ایک تیرہ سالہ فلسطینی بچے کو گرفتار کرکے نامعلوم مقام پر منتقل کردیا ہے۔ اس پر اسرائیلی فوجیوں پر چاقو سے حملے کی منصوبہ بندی کا الزام عائد کیا گیا ہے۔
رپورٹ کے مطابق اسرائیلی فوجیوں نے فلسطینی بچے کو الخلیل کے دورا قصبے سے مسجد ابراہیمی سے چند سو گز کے فاصلے سے حراست میں لیا۔ اس کی شناخت کرم عاطف قصاص کے نام سے کی گئی ہے جس کی عمر صرف تیرہ سال بیان کی جاتی ہے۔
اسرائیلی ذرائع کے مطابق گرفتار ہونے والے بچے کے قبضے سے ایک چاقو بھی برآمد کیا گیا ہے۔ گرفتاری کے بعد تفتیش کے لیے اسے ایک حراستی مرکز منتقل کردیا گیا ہے جہاں پولیس اور انٹیلی جنس ادارے اس سے تفتیش کررہے ہیں۔
خیال رہے کہ فلسطین میں یکم اکتوبر 2015 ء کے بعد سے جاری تحریک انتفاضہ کے دوران الخلیل شہر کے بچوں اور نوجوانوں نے سب سے زیادہ قربانیاں دی ہیں۔ اس شہرمیں اسرائیلی فوجیوں پر چاقو اور فائرنگ سے کئی حملے ہوچکے ہیں۔