اسرائیل کی ایک عدالت نے فلسطینی طالب علم مصعب صالح التلاحمہ کو نو ماہ قید اور 1800 ڈالر جرمانے کی سزا سنائی ہے۔ مصعب کے والد صالح التلاحمہ صہیونی فوج کی جارحیت میں شہید ہوچکے ہیں اور خود مصعب الخلیل شہر میں پولی ٹیکنک یونیورسٹی میں زیرتعلیم ہے۔
اسیر طالب علم کے اہل خانہ نے "مرکز اطلاعات فلسطین” کو بتایا کہ جنوبی رام اللہ میں قائم "عوفر” نامی عدالت نے گذشتہ روز طالب علم مصعب کے خلاف جاری مقدمہ کی سماعت کے دوران اسے نو ماہ قید اور اٹھاہ سو ڈالر جرمانہ کی سزا کا حکم دیا۔ جرمانہ کی عدم ادائیگی پر اٹھارہ ماہ اضافی قید کاٹنا ہوگی۔
خیال رہے کہ مصعب گذشتہ برس دسمبر سے "عوفر” جیل میں قید ہے۔ اسے ماضی میں بھی فلسطینی اتھارٹی اور اسرائیلی فوج نے کئی مرتبہ حراست میں لیا۔ مصعب کے والد اسلامی تحریک مزاحمت "حماس” کے ملٹری ونگ عزالدین القسام شہید بریگیڈ کے ایک اہم کمانڈر تھے جو انجینیئر صالح التلاحمہ کے نام سے جانے جاتے تھے۔ انہیں 2003 ء میں صہیونی فوج نے رام اللہ میں قاتلانہ حملے میں شہید کردیا تھا۔