کراچی – (فلسطین نیوز۔مرکز اطلاعات) فلسطین فاؤنڈیشن پاکستان کے مرکزی سیکرٹری جنرل صابر ابو مریم نے اپنے ہفت روزہ جاری بیان میں کہا ہے کہ پاکستان بھر میں کل جمعہ کو ’’یوم دفاع مسجد اقصیٰ ‘‘ منایا جائے گا اس عنوان سے انہوں نے عوام سے اپیل کی ہے کہ مسجد اقصیٰ (قبلہ اوّل ) کے دفاع کے لئے منعقد ہونے والے احتجاجی مظاہروں میں شرکت کریں اور علمائے کرام جمعہ نماز کے اجتماعات میں قبلہ اوّل بیت المقدس (مسجد اقصیٰ) کی سلامتی اور فلسطینیوں کے حق میں خصوصی دعائیں کریں۔
انہوں نے کہا کہ فلسطین فاؤنڈیشن پاکستان کے تحت کل ملک بھر میں ’’یوم دفاع مسجد اقصیٰ ‘‘ منایا جائے گا اور مرکزی احتجاجی مظاہرہ کراچی میں نیو میمن مسجد بولٹن مارکیٹ کے باہر بعد نماز جمعہ کیا جائے گا، ان کاکہنا تھا کہ مظاہرے میں سیاسی ومذہبی جماعتوں کے قائدین سمیت اہلیان کراچی شرکت کریں گے جبکہ مظاہرے کی قیادت متحدہ قومی موومنٹ پاکستان سے تعلق رکھنے والے رکن سندھ اسمبلی ڈاکٹر محفوظ یارخان ایڈوکیٹ، جمعیت علماء پاکستان کے مرکزی رہنما علامہ عقیل انجم قادری، پاکستان مسلم لیگ نواز کے رہنما پیرزادہ ازہر علی ہمدانی، پاکستان تحریک انصاف کے رہنما اسرار عباسی اور دیگر کریں گے۔انہوں نے اہلیان کراچی سے اپیل کی ہے کہ وہ میمن مسجد کے باہر احتجاجی مظاہرے میں اپنی شرکت کو یقینی بنائیں۔