یہودی بستیاں عالمی قوانین کی خلاف ورزی ہیں، بان کی مون

(فلسطین نیوز۔مرکز اطلاعات) اقوام متحدہ کے سیکرٹری جنرل بان کی مون نے اسرائیلی وزیراعظم بنیامین نیتن یاہو کے بیان کی مذمت کی ہے۔ بان کی مون کا کہنا تھا کہ یہودی بستیاں عالمی قوانین کی خلاف ورزی ہیں۔ ان کا قبضہ ختم ہونا چاہیے۔ بان کی مون نے کہا کہ اسرائیل نے کئی دہائیوں سے جاری توسیع پسندانہ پالیسی کے تحت 5 لاکھ یہودی فلسطینی زمین پر بسا لئے ہیں اور یہ اقدام فلسطینی ریاست کے قیام کی مکمل نفی ہے۔ سلامتی کونسل کے اسرائیلی فلسطینی تنازع کے بارے میں ایک اجلاس سے خطاب میں بان کی مون نے کہا کہ مجھے اسرائیلی وزیراعظم کے ایک حالیہ بیان پر پریشانی لاحق ہے، جس میں انھوں نے کہا ہے کہ جو لوگ یہودی بستیوں کی توسیع کے مخالف ہیں، وہ نسلی تطہیر کے حامی ہیں۔ یہ بیان بالکل ناقابل قبول اور اشتعال انگیز ہے۔ انہوں نے کہا کہ فلسطینیوں کی ریاستی سرزمین پر مکانوں کی تعمیر کی پالیسی بالکل غیر قانونی ہے۔ انھوں نے فلسطینی علاقوں پر اسرائیلی حکمرانی کے خاتمے کا مطالبہ کیا۔ ادھر امریکی محکمہ خارجہ کی ترجمان نے کہا ہے کہ اسرائیلی وزیراعظم کا بیان نامناسب ہے۔