مقبوضہ بیت المقدس – (فلسطین نیوز۔مرکز اطلاعات) اسرائیلی وزیراعظم بنجمن نیتن یاھو نے کہا ہے کہ وادی گولان اسرائیل کا جزو لا ینفک (اٹوٹ انگ) ہے اسے خالی نہیں کیا جائے گا۔
فلسطین نیوز کو موصول ہونے والی اطلاعات کے مطابق گذشتہ روز وادی گولان میں ’کٹزرین‘ یہودی کالونی میں مزید مکانات کے افتتاح کے موقع پرایک تقریب سے خطاب کرتے ہوئے نیتن یاھو نے کہا کہ ہم یہاں موجود ہیں اور آئندہ بھی یہیں موجود رہیں گے۔ وادی گولان اسرائیل کا حصہ ہے ، اسے کسی صورت میں خالی نہیں کیا جائے گا۔انہوں نے مزید کہا کہ وادی گولان کا مستقبل اسرائیل ہی کے ساتھ وابستہ ہے۔ ان کا کہنا تھا کہ اگر اسرائیل وادی گولان کو خالی کرتا ہے اس پر اسلامی انتہا پسند قبضہ کرلیں گے۔
خیال رہے کہ رواں سال اپریل میں اسرائیل نے کابینہ کا اجلاس وادی گولان میں منعقد کیا تھا۔ سنہ 1967ء کے بعد وادی گولان پر اسرائیلی کابینہ کا یہ پہلا اجلاس ہے۔ شام کے وادی گولان پر اسرائیل نے سنہ 1967ء کی چھ روزہ ۔ عرب اسرائیل جنگ میں ناجائز قبضہ کرلیا تھا۔