فلسطین نیوز کو موصول ہونے والی اطلاعات کے مطابق اخبار ’القدس‘ کی جانب سے گذشتہ روز ایک خبر شائع کی گئی تھی جس میں کہا گیا تھا کہ اس نے اسرائیلی وزیردفاع آوی گیڈورلائبرمین کا انٹرویو کیا ہے جسے کل شائع کیا جائے گا۔ اس خبر پر فلسطینی عوام میں شدید غم وغصے کی لہر دوڑ گئی ہے۔
سوشل میڈیا پر بھی اخبار القدس کی جانب سے صہیونی وزیر دفاع اور فلسطینیوں کے قاتل آوی گیڈور لائبرمین کا انٹرویو شائع کرنے کی شدید مذمت کی جا رہی ہے۔ شہریوں کا کہنا ہے کہ فلسطینی اتھارٹی کے مقرب اخبار نے لائبرمین کا انٹرویو شائع کرکے فلسطینی قوم کے زخموں پر نمک پاشی کی ہے۔
سوشل میڈیا پر جاری سخت تنقیدی بحث میں سماجی کارکنوں نے القدس کے اس اقدام کو صہیونی دشمن کے ساتھ راہ و رسم بڑھانے اور صہیونی ریاست کے ساتھ تعلقات استوار کرنے کی مذموم کوشش قرار دیا ہے۔
خیال رہے کہ القدس اخبار نے حال ہی میں اسرائیلی وزیر دفاع کا انٹرویو کیا تھا جسے آج سوموار کی اشاعت میں شائع کیا گیا ہے۔ لائبرمین کا انٹرویو شائع کرنے پر فلسطینی سیاسی ، عوامی اور سماجی حلقوں کی طرف سے فلسطینی اتھارٹی کے خلاف بھی شدید رد عمل جاری ہے۔ سماجی تنظیموں نے لائبرمین کا انٹرویو شائع کرنے پر ’روزنامہ القدس‘ کا بائیکاٹ کرنے کا مطالبہ کیا ہے۔