مقبوضہ بیت المقدس (فلسطین نیوز۔مرکز اطلاعات) اسرائیل کے دارالحکومت میں ہزاروں افراد نے سپریم کورٹ کے اختیارات محدود کرنے کے مجوزہ قانون کے خلاف مظاہرہ کیا۔ مجوزہ بل کا مقصد سپریم کورٹ کا آئین سے متصادم قوانین پر نظرثانی اور انہیں کالعدم قرار دینے کا اختیار واپس لینا ہے ۔
فلسطین نیوز کو موصول ہونے والی اطلاعات کے مطابق مظاہرین نے بینر اٹھا رکھے تھے جن پر تحریر تھا ،’’نیتن یاہو اپنے ہاتھ سپریم کورٹ سے دور رکھو۔ کرپٹ وزیراعظم ، تمہارے پاس ایسا کوئی مینڈیٹ نہیں، سپریم کورٹ کو چھوڑ دو‘‘۔انہوں نے اسرائیلی وزیراعظم نیتن یاہو کے خلاف نعرے بازی کی۔ سینکڑوں مظاہرین نے تل ابیب کی گلیوں میں مارچ کیا، انہوں نے عزم کا اظہار کیا کہ اسرائیل کو ’’نیتن یاہو سٹیٹ ‘‘بنے نہیں دینگے ۔ انہوں نے الزام لگایا کہ زیادہ سے زیادہ اختیارات اپنے ہاتھ میں لینا چاہتے ہیں۔
رہورٹ کے مطابق اسرائیلی پارلیمنٹ 29 اپریل کو شروع ہونیوالے سیشن میں مجوزہ بل پر بحث کرے گی۔ بل کی منظوری کی صورت میں یہ اختیار صرف پارلیمنٹ کے پاس ہو گا کہ کسی بھی قانون میں ترمیم یا اسے منسوخ کر ے ۔ بل کے مخالفین کے مطابق مجوزہ بل ان بنیادی حقوق کی خلاف ورزی ہے جن کی آئین میں ضمانت دی گئی ہے ۔