تہران – (فلسطین نیوز۔مرکز اطلاعات) اسلامی جمہوریہ ایران کی وزارت خارجہ کے ترجمان بہرام قاسمی نے غزہ پٹی پر قدس کی جابر اور غاصب صیہونی حکومت کے وحشیانہ حملے کی شدید الفاظ میں مذمت کرتے ہوئے شہید ہونے والے فلسطینیوں کے لواحقین کے ساتھ ہمدری کا اظہار کیا.
فلسطین نیوز کو موصول ہونے والی اطلاعات کے مطابق ترجمان دفترخارجہ بہرام قاسمی نے اپنے ایک بیان میں غزہ پٹی پر صیہونیوں کے حملے کی شدید الفاظ میں مذمت کرتے ہوئے کہا کہ غاصب صیہونی حکومت غلط فہمی کا شکار ہے۔انہوں نے کہا کہ ایسے جارحانہ حملوں اور فلسطینی نوجوانوں کے قتل عام سے ناجائز صیہونی حکومت کا مقصد فلسطینی عوام کے پختہ عزم وارادے کو کمزور کرنا ہے جبکہ گزشتہ سات دہائیوں کے دوران صیہونی جلاد صفت حکومت کے جارحانہ مظالم اور وحشیانہ قتل عام سے فلسطین کے بہادر سپوتوں کے عزم ارادے پر کوئی اثر نہیں پڑا۔
فلسطینی ذرائع ابلاغ کے مطابق اسرائیلی فوج نے پیر کو غزہ پٹی کے علاقے خان یونس میں فضائی کارروائی کرتے ہوئے ایک سرنگ کو نشانہ بنایا جس کے نتیجے میں 8 فلسطینی شہید اور9 زخمی ہوگئے۔