آئرلینڈ (فلسطین نیوز۔مرکز اطلاعات) یورپی ملک آئرلینڈ کی سینٹ میں فلسطین کے مقبوضہ مغربی کنارے میں اسرائیل کے غیرقانونی کارخانوں میں تیار ہونے والی مصنوعات کے بائیکاٹ کا بل منظور کرلیا۔ اس بل کی منظوری کے بعد اسرائیلی کارخانوں کی مصنوعات کی آئرلینڈ میں درآمدات پر پابندی کی راہ ہموار ہو گئی ہے۔
فلسطین نیوز کو موصول ہونے والی اطلاعات کے مطابق آئرلینڈ کی پارلیمنٹ نے اسرائیلی مصنوعات پر پابندی کے بل پر رواں سال جنوری میں رائے شماری کا فیصلہ کیا تھا تاہم آئرش حکومت اور پارلیمنٹ کے درمیان ایک معاہدہ طے پایا جس کے تحت حکومت نے بل کی منظوری سے قبل صیہونی ریاست پر دباؤ ڈالنے کا یقین دلایا تھا۔ تاہم آئرش حکومت غرب اردن میں صیہونی کالونیوں کے کارخانوں میں تیار ہونے والی مصنوعات کی روک تھام کے حوالے سے کوئی مؤثر اقدام نہیں کرسکی۔اسرائیلی مصنوعات کی درآمدات کے بائیکاٹ کی کوششوں پر اسرائیل نے اپنے ہاں متعین آئرلینڈ کی خاتون وزیر کو وزارت خارجہ میں طلب کرکے شدید احتجاج کیا تھا۔
اسرائیلی وزیراعظم بنجمن نیتن یاھو نے الزام عائد کیا ہے کہ آئرلینڈ کی پارلیمنٹ کے آزاد ارکان نے صیہونی ریاست کے بائیکاٹ کی عالمی تحریک ’بی ڈی ایس‘ سے متاثر ہو کرصیہونی مصنوعات کے بائیکاٹ کا بل پیش کیا ہے۔