واشنگٹن (فلسطین نیوز۔مرکز اطلاعات) ہزاروں امریکی مسلمانوں نے صدر ٹرمپ کی جانب سے بیت المقدس کو اسرائیل کا دارالحکومت تسلیم کیے جانے کے خلاف واشنگٹن میں مظاہرہ کیا۔
فلسطین نیوز کو موصول ہونے والی اطلاعات کے مطابق اسلام امریکہ تعلقات کونسل نے ٹرمپ کے قدس مخالف فیصلے کے خلاف مظاہروں کی اپیل کی تھی اور امریکہ کی پینتس دیگر تنظیموں نے اس کی حمایت کا اعلان کیا تھا۔مظاہرین نے فلسطین کی حمایت میں نعرے لگاتے ہوئے کانگریس کی عمارت تک مارچ کیا جہاں مختلف مسلم رہنماؤں نے مظاہرین سے خطاب بھی کیا۔
مظاہرین نے پچاس میٹر طویل فلسطینی پرچم بھی اپنے ہاتھوں میں اٹھا رکھا تھا اور وہ امریکی صدر ٹرمپ کے قدس مخالف فیصلے کے خلاف نعرے لگا ر ہے تھے۔
مظاہرین نے اپنے ہاتھوں میں ایسے بینر اور پلے کارڈ بھی اٹھا رکھے تھے جن پر ٹرمپ اور نتن یاہو نازی ہیں، ٹرمپ اور نیتن یاہو جنگ پسند ہیں، جیسے نعرے درج تھے۔