ادیس ابابا (فلسطین نیوز۔مرکز اطلاعات) افریقی اتحاد نے امریکی صدر ڈونلڈ ٹرمپ کی طرف سے مقبوضہ بیت المقدس کو صیہونی ریاست کا دارالحکومت قرار دیے جانے کی شدید مذمت کی ہے۔
فلسطین نیوز کو موصول ہونے والی اطلاعات کے مطابق افریقی یونین کے کمیشن کے چیئرمین موسیٰ محمد فکی نے ایک بیان میں کہا ہے کہ القدس کو اسرائیلی ریاست کا دارالحکومت قرار دینا انتہائی افسوسناک ہے۔انہوں نے کہا کہ امریکی صدر کے اقدام سے پورے خطے میں کشیدگی پیدا ہوگی اور اس کے اثرات نہ صرف فلسطین۔ اسرائیل تنازع پر مرتب ہوں گے بلکہ پورے مشرق وسطیٰ پر اس کے منفی اثرات پڑیں گے۔
افریقی کمیشن کے سربراہ نے امریکی صدر ڈونلڈ ٹرمپ کے القدس سے متعلق اعلان کو مسترد کرتے ہوئے مظلوم فلسطینی قوم کے ساتھ یکجہتی کا اظہار کیا ہے۔